Bishita di komishon KOREL na Konseho Insular di Boneiru

E enkuentro a tuma lugá den Passangrahan i a duna espasio pa un diálogo habri i sustansial tokante vários temanan importante pa desaroyo di e isla.

Miembronan di Konseho Insular tabata presente pa tene un diálogo ku e delegashon di KOREL, ku tabata forma pa:

• Olger van Dijk (presidente di komishon, NSC)
• Raoul White (GroenLinks-PvdA)
• Aukje de Vries (VVD)
• Faith Bruyning (NSC)
• Mpanzu Bamenga (D66)
• Don Ceder (ChristenUnie)
• Eva Meijers (sekretario di komishon)

Durante e reunion, e tema di edukashon a keda trata ampliamente. A papia tokante e nesesidat di invershon struktural den edukashon na tur nivel. A enfatisá riba: maneho di idioma, sosten di enseñansa multilingual i edukashon spesial.

Tantu e miembro di komishon komo e miembro di Konseho Insular a ekspresá apresio pa e diálogo habri. E tipo di enkuentro nan aki ta di gran importansia pa mantené e komunikashon, yega na solushon huntu i fortifiká relashon entre Boneiru i Hulanda.

Konseho Insular ta spera di kontinua e diálogo i tuma pasonan konkreto huntu ku komishon KOREL i gobièrnu Hulandes.